Main Menu

പുതിയ കെപിസിസി ഭാരവാഹികളെയും ഉടന്‍ തീരുമാനിക്കും; മുല്ലപ്പള്ളി രാമചന്ദ്രന്‍ ചുമതലയേറ്റതിന് ശേഷം ചര്‍ച്ചകള്‍ തുടങ്ങും; ഭാരവാഹികളുടെ എണ്ണം കുറയ്ക്കാനും തീരുമാനം

തിരുവനന്തപുരം: പുതിയ കെപിസിസി ഭാരവാഹികളെയും ഉടന്‍ തീരുമാനിക്കും.ലോക്‌സഭാ തെരഞ്ഞെടുപ്പിന് മുമ്പ് പുതിയ ഭാരവാഹികള്‍ വരും. കെപിസിസി അധ്യക്ഷനായി മുല്ലപ്പള്ളി രാമചന്ദ്രന്‍ ചുമതലയേറ്റതിന് ശേഷം ചര്‍ച്ചകള്‍ തുടങ്ങും. ഭാരവാഹിപ്പട്ടിക ഹൈക്കമാന്‍ഡിന് കൈമാറും.

കെപിസിസി ഭാരവാഹികളുടെ എണ്ണം കുറയ്ക്കാനും തീരുമാനമായി. വര്‍ക്കിങ് പ്രസിഡന്റുമാര്‍ ഉണ്ടെങ്കിലും വൈസ് പ്രസിഡന്റുമാരെയും നിയമിക്കും.

മാസങ്ങള്‍ നീണ്ട ചര്‍ച്ചകള്‍ക്കൊടുവിലാണ് കേരളത്തിലെ കോണ്‍ഗ്രസിന് പുതിയ നേതൃത്വത്തെ തെരഞ്ഞെടുത്തത്.  പ്രാദേശിക, സാമുദായിക പരിഗണനകളും ഗ്രൂപ്പുകളുടെ പ്രത്യക്ഷ, പരോക്ഷ നിലപാടുകളും അനുകൂലമായതാണ് മുല്ലപ്പള്ളി രാമചന്ദ്രനെ പുതിയ കെപിസിസി അധ്യക്ഷനായി തെരഞ്ഞെടുക്കാന്‍ കാരണമെന്നാണ് കണക്കുകൂട്ടല്‍. മൂന്നു വര്‍ക്കിങ് പ്രസിഡന്റുമാരുണ്ട്- എം.ഐ.ഷാനവാസ്, കെ.സുധാകരന്‍, കൊടിക്കുന്നില്‍ സുരേഷ്. യുഡിഎഫ് കണ്‍വീനറായി ബെന്നി ബഹനാനും പ്രചാരണ സമിതി അധ്യക്ഷനായി കെ.മുരളീധരനും ചുമതലയേല്‍ക്കും.

കെ.വി.തോമസ്, കൊടിക്കുന്നില്‍ സുരേഷ്, കെ.സുധാകരന്‍, വി.ഡി.സതീശന്‍, കെ.മുരളീധരന്‍ തുടങ്ങിയവരാണ് പരിഗണനാപ്പട്ടികയിലുണ്ടായിരുന്ന മറ്റുള്ളവര്‍. കെപിസിസി അധ്യക്ഷന്‍, യുഡിഎഫ് കണ്‍വീനര്‍, രാജ്യസഭാസീറ്റ്, കോണ്‍ഗ്രസ് പ്രവര്‍ത്തകസമിതി അംഗത്വങ്ങള്‍ എന്നിവയുള്‍പ്പെട്ട ‘പാക്കേജ്’ നടപ്പാക്കാനാണ് നേതൃത്വം ലക്ഷ്യമിട്ടത്.

സ്വന്തം സ്ഥാനാര്‍ഥിക്ക് വേണ്ടി കര്‍ക്കശ നിലപാടെടുക്കാത്ത എ ഗ്രൂപ്പ്, മുല്ലപ്പള്ളിയെ പിന്തുണച്ചിരുന്നു.

ഡിസിസി പ്രസിഡന്റുമാരുടെ മനസ്സറിയാന്‍ നടത്തിയ ‘വോട്ടെടുപ്പില്‍’ പലരും ഗ്രൂപ്പ് താല്‍പര്യമനുസരിച്ചുള്ള പേരുകള്‍ അറിയിച്ചപ്പോള്‍ മുന്നിലെത്തിയതു വി.ഡി.സതീശന്‍, ബെന്നി ബഹനാന്‍, കെ.സുധാകരന്‍ എന്നിവരാണ്. നിലവിലെ രാഷ്ട്രീയ സാഹചര്യത്തിന് യോജ്യനായ, ചുറുചുറുക്കുള്ള നേതാവ് പ്രസിഡന്റാകണമെന്ന് പറഞ്ഞ ഏതാനും ചിലര്‍ സമദൂരം പാലിച്ചു.



Comments

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലനാട് ഓൺലൈനിന്റേതല്ല . അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്