Main Menu

മത്സരത്തിന് മുമ്പ് യുവന്റസില്‍ താരമായി റൊണാള്‍ഡോ; ഷോള്‍ഡര്‍ ഗോളില്‍ അമ്പരന്ന് സഹതാരങ്ങള്‍; വീഡിയോ സോഷ്യല്‍ മീഡിയയില്‍ വന്‍ ഹിറ്റ്‌

ഫുട്‌ബോള്‍ ലോകത്തെ തന്നെ അമ്പരപ്പിക്കുന്നതായിരുന്നു പോര്‍ച്ചുഗല്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ കൂട് മാറ്റം. റയല്‍ വിട്ട് താരം യുവന്റസിലേക്ക് ചേക്കേറിയപ്പോള്‍ റയല്‍ ആരാധകര്‍ നിരാശയിലായി. ഇറ്റാലിയന്‍ ലീഗിലെ റെക്കോര്‍ഡ് ട്രാന്‍സ്ഫറിനാണ് റൊണാള്‍ഡോ യുവന്റസിലേക്ക് മാറിയത്. തുടര്‍ച്ചയായി മൂന്ന് ചാംപ്യന്‍സ് ലീഗ് കിരീടവും രണ്ട് ബാലന്‍ ഡി ഓറും നേടിയതിന്റെ തിളക്കത്തിലാണ് താരം റയല്‍ വിട്ടത്.

മുപ്പത്തിമൂന്ന് വയസുള്ള താരത്തിന് വേണ്ടിയാണ് യിവന്റസ് നൂറ് ദശലക്ഷം യൂറോ മുടക്കിയത് എന്നതാണ് എല്ലാവരേയും അതിശയിപ്പിക്കുന്ന മറ്റൊരു കാര്യം. ഇതെല്ലാം ചൂണ്ടിക്കാട്ടുന്നത് ഫുട്‌ബോള്‍ ലോകത്ത് ഇതിഹാസം താരം തന്നെയാമ് റൊണാള്‍ഡോ എന്ന് തന്നെയാണ്. യുവന്റസിനൊപ്പം പരിശീലനം തുടങ്ങിയിട്ട് ദിവസങ്ങളായിട്ടുള്ളുവെങ്കിലും പരിശീലനത്തിനിടയില്‍ തന്നെ താരം തന്റെ പ്രകടനം പുറത്തെടുത്തു് തുടങ്ങിയിരിക്കുകയാണ്.

പരിശീലനത്തിന്റെ ദൃശ്യങ്ങള്‍ പുറത്ത് വന്നതോടെ .യുവന്റസിലും താരത്തിന് ആരാധകര്‍ കൂടിയിട്ടുണ്ട്. യുവന്റസ് പരിശീലനത്തിനിടെ റൊണാള്‍ഡോ നേടിയ ഒരു ഗോളാണ് സോഷ്യല്‍ മീഡിയയിലും ഫുട്‌ബോള്‍ ആരാധകര്‍ക്കിടയിലും ഇപ്പോള്‍ ചര്‍ച്ചയായിരിക്കുന്നത്. പെനാല്‍റ്റി ബോക്‌സിനപ്പുറത്ത് നിന്നുമുള്ള ക്രോസ് ബാര്‍ ചാലഞ്ചിലാണ് റൊണാള്‍ഡോ തന്റെ സ്‌കില്‍ കാണിക്കുന്നത്. ക്രോസ് ബാറില്‍ തട്ടി വന്ന പന്ത് നിലത്ത് വീഴും മുമ്പ് തന്റെ ഷോള്‍ഡര്‍ കൊണ്ട് വലയിലേക്കു തട്ടിയിടുതയാണ് റോണോ.

റൊണാള്‍ഡോയും ഡിബാലയും കൂടിയുള്ള പരിശീലനത്തിന്റെ ദൃശ്യങ്ങളും ആരാധകര്‍ക്കിടയില്‍ തരംഗമായിരിക്കുകയാണ്. അടുത്ത മെസിയെന്ന് വിശേഷിപ്പിക്കുന്ന ഡിബാലയും മെസിക്കൊപ്പം നില്‍ക്കുന്ന താരമായ റൊണാള്‍ഡോയും ചേര്‍ന്നുള്ള കൂട്ടുകെട്ടിന്റെ പ്രകടനം എങ്ങനെയായിരിക്കുമെന്ന് കാണാനുള്ള ആകാംക്ഷയിലാണ് ഫുട്‌ബോള്‍ ലോകം. ഇന്റര്‍നാഷണല്‍ ചാംപ്യന്‍സ് കപ്പിന്റെ മത്സരങ്ങളില്‍ പ്രധാന താരങ്ങള്‍ ഇല്ലാത്തതുകൊണ്ട് റൊണാള്‍ഡോയുടെ ആദ്യ യുവന്റസ് മത്സരം കാണാന്‍ ഓഗസ്റ്റ് 18 വരെ ആരാധകര്‍ക്ക് കാത്തിരിക്കണം.

View image on TwitterView image on TwitterView image on Twitter

Forza Juventus@ForzaJuve2017

Cristiano Ronaldo & Paulo Dybala during today’s training session.

സീരിസ് എയില്‍ ചീവോ വെറോണക്കെതിരെയുള്ള ആദ്യ മത്സരത്തില്‍ റൊണാള്‍ഡോ കളിക്കാനിറങ്ങുമെന്നാണ് ആരാധകരുടെ പ്രതീക്ഷ. യുവന്റസിന്റെ മൈതാനത്ത് ഏഴു ദിവസങ്ങള്‍ക്ക് ശേഷം ലാസിയോക്കെതിരെയും താരം കളിക്കും. ഇന്റര്‍മിലാന്‍, റോമ അടക്കമുള്ള ക്ലബുകള്‍ മികച്ച താരങ്ങളെ വാങ്ങി കിരീടപ്പോരാട്ടത്തില്‍ യുവന്റസിന് കനത്ത വെല്ലുവിളിയുയര്‍ത്താനുള്ള നീക്കത്തിലാണ്.

2009 മുതല്‍ സ്പാനിഷ് ക്ലബ് റയല്‍ മഡ്രിഡിന്റെ സൂപ്പര്‍ താരമായിരുന്ന ക്രിസ്റ്റ്യാനോയെ പത്തു കോടി യൂറോ (ഏകദേശം 805 കോടി രൂപ) മുടക്കിയാണ് ഇറ്റാലിയന്‍ ക്ലബ് യുവെന്റ്‌സ് സ്വന്തമാക്കിയത്. ഏകദേശം 242 കോടി രൂപ വാര്‍ഷിക ശമ്പളത്തില്‍ നാലു വര്‍ഷത്തേക്കാണു കരാറെന്നു സ്പാനിഷ് മാധ്യമങ്ങള്‍ റിപ്പോര്‍ട്ട് ചെയ്തു. ഏഴു സീസണുകളിലായി യുവെന്റസാണ് ഇറ്റാലിയന്‍ സീരി എ ചാംപ്യന്‍മാര്‍.

കരാറുമായി ബന്ധപ്പെട്ട കൂടുതല്‍ കാര്യങ്ങള്‍ റൊണാള്‍ഡോയുമായി അവസാനഘട്ട കൂടിക്കാഴ്ച നടത്തിയതിന് ശേഷമായിരിക്കും തീരുമാനിക്കുക. അതേസമയം, പകരക്കാരനായി റയലിലേക്ക് ആരെന്ന കാര്യത്തില്‍ വ്യക്തതയില്ല. ഫ്രഞ്ച് ക്ലബ് പിഎസ്ജിയുടെ താരങ്ങളായ നെയ്മറുടെയും കിലിയന്‍ എംബപെയുടെയും പേരുകള്‍ ഇപ്പോള്‍ സജീവമാണ്.

കഴിഞ്ഞ സീസണില്‍ യുവേഫ ചാംപ്യന്‍സ് ലീഗ് ക്വാര്‍ട്ടര്‍ ഫൈനല്‍ ആദ്യപാദ മത്സരത്തില്‍ യുവെന്റസിനെതിരെ അവരുടെ മൈതാനത്തായിരുന്നു ക്രിസ്റ്റ്യാനോയുടെ ബൈസിക്കിള്‍ കിക്ക്. ഈ മല്‍സരത്തില്‍ റയല്‍ 3-0നു ജയിച്ചു. ഇപ്പോള്‍ അതേ മൈതാനത്തേക്കാണ് മുപ്പത്തിമൂന്നുകാരന്‍ ക്രിസ്റ്റ്യാനോ എത്തുന്നത്.

പോര്‍ച്ചുഗീസ് ക്ലബ് സ്‌പോര്‍ട്ടിങ് സിപിയില്‍നിന്ന് ഇംഗ്ലിഷ് ക്ലബ് മാഞ്ചസ്റ്റര്‍ യുണൈറ്റഡില്‍ എത്തിയതോടെയാണു ക്രിസ്റ്റ്യാനോയ്ക്കു സൂപ്പര്‍താര പരിവേഷം ലഭിച്ചത്. യുണൈറ്റഡ് കോച്ച് സര്‍ അലക്‌സ് ഫെര്‍ഗൂസന്റെ കീഴില്‍ ആറു വര്‍ഷം ഇംഗ്ലണ്ടില്‍ തുടര്‍ന്ന ക്രിസ്റ്റ്യാനോ 2009ല്‍ അന്നത്തെ റെക്കോര്‍ഡ് തുകയായ എട്ടു കോടി പൗണ്ടിനാണ് (ഏകദേശം 728 കോടി രൂപ) സ്പാനിഷ് ക്ലബ് റയലില്‍ ചേര്‍ന്നത്.

റയലിനൊപ്പം നാലുതവണ ചാംപ്യന്‍സ് ലീഗ്, രണ്ടു തവണ ലാ ലിഗ, സ്പാനിഷ് കപ്പ്, മൂന്നു തവണ ഫിഫ ക്ലബ് ലോകകപ്പ് കിരീട നേട്ടങ്ങളില്‍ പങ്കാളിയായി. റയലിനുവേണ്ടി 451 ഗോളുകള്‍ നേടിയ ക്രിസ്റ്റ്യാനോ ക്ലബ്ബിന്റെ ടോപ് സ്‌കോററുമാണ്. പോര്‍ച്ചുഗല്‍ ദേശീയ ടീം ക്യാപ്റ്റനായ റൊണാള്‍ഡോ 2016ലെ യൂറോ കപ്പ് കിരീടനേട്ടത്തിലേക്കു ടീമിനെ നയിച്ചു. ഇത്തവണത്തെ ലോകകപ്പില്‍ പോര്‍ച്ചുഗല്‍ പ്രീക്വാര്‍ട്ടറില്‍ യുറഗ്വായോടു പരാജയപ്പെട്ടു. അഞ്ചു തവണ ലോക ഫുട്‌ബോളറായി തിരഞ്ഞെടുക്കപ്പെട്ടിട്ടുണ്ട്.

റയലിനു വേണ്ടി ക്രിസ്റ്റ്യാനോയുടെ അരങ്ങേറ്റം കാണാനെത്തിയത് 85, 000 ആരാധകരാണ്. തുടര്‍ന്ന് പിന്നിട്ട ഒന്‍പതു സീസണുകളില്‍ എട്ടെണ്ണത്തിലും നാല്‍പതിലധികം ഗോളുകള്‍ വീതം നേടി ക്രിസ്റ്റ്യാനോ ക്ലബിന്റെ വീരനായകനായി. 12 വര്‍ഷത്തെ കാത്തിരിപ്പിനൊടുവില്‍ റയല്‍ ചാംപ്യന്‍സ് ലീഗ് കിരീടം 2014ല്‍ നേടിയതും ക്രിസ്റ്റ്യാനോയുടെ മികവിന്റെ കരുത്തിലാണ്. തുടര്‍ന്ന് മൂന്നുതവണ കൂടി ക്ലബ് യൂറോപ്പിന്റെ ചാംപ്യന്‍മാരായതിലും സൂപ്പര്‍താരത്തിന്റെ പ്രതിഭയാണ് നിര്‍ണായകമായത്. ഇക്കഴിഞ്ഞ ചാംപ്യന്‍സ് ലീഗ് ഫൈനലി!ല്‍ റയല്‍ വിജയികളായതിനു പിന്നാലെ ക്ലബ് വിട്ടേക്കുമെന്നു സൂചിപ്പിച്ച ക്രിസ്റ്റ്യാനോ പിന്നീട് ഇതു തിരുത്തിയിരുന്നു. എന്നാല്‍, കുറേ ആഴ്ചകളായി ക്ലബ് മാറ്റത്തെക്കുറിച്ച് ഊഹാപോഹങ്ങള്‍ ശക്തമായിരുന്നു.

ക്രിസ്റ്റ്യാനോയുടെ വിടവാങ്ങലോടെ റയല്‍ മഡ്രിഡിന്റെ സുവര്‍ണ കാലഘട്ടത്തിലെ ഒരു അധ്യായത്തിനാണു തിരശ്ശീല വീഴുന്നത്. ഒരു പതിറ്റാണ്ടായി റയല്‍ മഡ്രിഡ് – ബാര്‍സിലോന പോരാട്ടത്തെക്കാള്‍ ആരാധകരുടെ ശ്രദ്ധയാകര്‍ഷിച്ചിരുന്നത് ഇരു ടീമുകളുടെയും പ്രധാന താരങ്ങളായ ക്രിസ്റ്റ്യാനോയുടെയും ലയണല്‍ മെസ്സിയുടെയും കൊമ്പുകോര്‍ക്കലുകളായിരുന്നു. ഇനി ഇവര്‍ തമ്മില്‍ പൊരുതുന്നതു യൂറോപ്യന്‍ ക്ലബ് ടൂര്‍ണമെന്റുകളുടെ പൊതുവേദിയില്‍ മാത്രമാകും.



Comments

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലനാട് ഓൺലൈനിന്റേതല്ല . അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്