Main Menu

ഇന്ധനവില കുറയ്ക്കണമെന്ന ആവശ്യം തള്ളി കേന്ദ്രം; എക്‌സൈസ് തീരുവ കുറയ്ക്കാന്‍ കഴിയില്ല; നികുതി കുറയ്ക്കുന്നത് സര്‍ക്കാരിന്റെ ധനക്കമ്മിയെ ബാധിക്കുമെന്ന് വിശദീകരണം

ന്യൂഡല്‍ഹി: ഇന്ധനവില കുറയ്ക്കണമെന്ന ആവശ്യം തള്ളി കേന്ദ്രസര്‍ക്കാര്‍. എക്‌സൈസ് തീരുവ കുറയ്ക്കാന്‍ കഴിയില്ലെന്ന് കേന്ദ്രസര്‍ക്കാര്‍ വ്യക്തമാക്കി. നികുതി കുറയ്ക്കുന്നത് സര്‍ക്കാരിന്റെ ധനക്കമ്മിയെ ബാധിക്കും. ധനക്കമ്മി ഉയരുന്നത് രൂപയുടെ മൂല്യത്തില്‍ ഇടിവുണ്ടാക്കും. നികുതി കുറച്ചാല്‍ വികസന പ്രവര്‍ത്തനങ്ങള്‍ നിര്‍ത്തിവെക്കേണ്ടി വരുമെന്നും കേന്ദ്രം അറിയിച്ചു.

പെട്രോളിന് ലിറ്ററിന് 19.47 രൂപയും ഡീസലിന് 15.33 രൂപയുമാണ് കേന്ദ്ര സർക്കാർ എക്സൈസ് നികുതിയായി ഈടാക്കുന്നത്. സംസ്ഥാനങ്ങൾ അവരുടെ രീതി അനുസരിച്ചും എക്സൈസ് നികുതി ഈടാക്കുന്നുണ്ട്.

ഇന്ധന വില വർദ്ധന നിയന്ത്രിക്കാൻ തങ്ങൾക്ക് കഴിയില്ലെന്നാണ് കേന്ദ്രത്തിന്റെ നിലപാട്. ആഗോള തലത്തിലുള്ള ഘടകങ്ങളാണ് വിലവർദ്ധനയ്ക്ക് അടിസ്ഥാനമെന്നാണ് കേന്ദ്ര മന്ത്രി രവിശങ്കർ പ്രസാദ് പറഞ്ഞത്. എണ്ണ ഉത്പാദക രാജ്യങ്ങൾ കയറ്റുമതിക്ക് നിയന്ത്രണം ഏർപ്പെടുത്തിയിട്ടുണ്ട്. വെനിസ്വേലയിലെ സാമ്പത്തിക മാന്ദ്യവും ഇറാനു മേൽ യു.എസ് ഉപരോധം ഏർപ്പെടുത്തിയതും എണ്ണ വിലയിൽ പ്രതിഫലിക്കുന്നു. ഇതിലൊന്നും സർക്കാരിന് ഇടപെടാൻ കഴിയില്ലെന്നും അദ്ദേഹം വ്യക്തമാക്കി.

അതേസമയം തുടർച്ചയായ 42ആം ദിവസവും ഇന്ധനവില കൂടി. ഇന്ന് വീണ്ടും 15 പൈസ വീതം വർദ്ധിപ്പിച്ചതോടെ കൊച്ചിയിൽ പെട്രോൾ വില ലിറ്ററിന് 82.95 രൂപയായി. ഡീസലിന് 76.95 രൂപയാണ്. തിരുവനന്തപുരത്ത് ഒരു ലിറ്റർ പെട്രോളിന് 84.19 രൂപയും ഡീസലിന് 78.14 രൂപയുമാണ് ഇന്നത്തെ വില. കോഴിക്കോട് യഥാക്രമം 83.11, 77.15 എന്നിങ്ങനെയാണ് വില. മൂന്നാഴ്ച കൊണ്ടു പെട്രോളിനു 3.35 രൂപയും ഡീസലിന് 4.04 രൂപയുമാണു കൂടിയത്.



Comments

ഇവിടെ പോസ്റ്റു ചെയ്യുന്ന അഭിപ്രായങ്ങൾ മലനാട് ഓൺലൈനിന്റേതല്ല . അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്